Восем шпацыраў, каб закахацца ў зялёную Варшаву
З мая па кастрычнік 2026 года фонд «Неруш Натура» запрашае ўсіх ахвотных далучыцца да праекта «Зялёныя адкрыцці Варшавы». Яго мэта — паказаць сталіцу з нечаканага боку: праз яе паркі, лясы, вадаёмы і іншыя прыродныя куточкі, а заадно дапамагчы прадстаўнікам беларускай дыяспары лепш адчуць сябе ў горадзе і пазнаёміцца адно з адным.
На працягу праекта адбудуцца восем адукацыйных прагулак па самых цікавых прыродных і гарадскіх лакацыях Варшавы. Удзельнікі даведаюцца, як уладкаваны гарадскія экасістэмы і што стаіць за прынцыпамі ўстойлівага развіцця, а таксама паўдзельнічаюць у інтэграцыйных гульнях і сумесных актыўнасцях.
Акрамя саміх шпацыраў, у межах праекта мы падрыхтуем двухмоўныя — па-беларуску і па-польску — інфармацыйныя матэрыялы і серыю адукацыйных публікацый у сацыяльных сетках. Яны будуць прысвечаны ахове прыроды, адказнаму спажыванню і экалагічнаму ладу жыцця ў вялікім горадзе.
Праект рэалізуецца ў рамках Funduszu Edukacji Ekologicznej — сумеснай ініцыятывы Biura Ochrony Powietrza i Polityki Klimatycznej і Staromiejskiego Domu Kultury. Фінансаванне ажыццяўляецца са сродкаў бюджэту горада Варшавы.
